مذكرات طالبه فاشله

. الحلقة الأولى

( يا فتاح يا عليم ... يا رزاق يا كريم )

بسم الله الرحمن الرحيم

من أول السطر

ده أول كلامى هنا فى البلوج ..اللى حسيت إنه هيبقى المنفذ ليا من مشاكل الكلية

والبيت والتاكسيات والميكروباصات وأى حاجة تانية بتعمل مشاكل

.
البلوج إسمه يوميات طالبة فاشلة

لسبب بسيط ..إن اللى بتكتبه طالبه بتكره المذاكرة وأقصى إنجاز

بتعمله إنها تقعد على الكتاب بتاعها نص ساعة

متواصلة (طبعا منهم ربع ساعة بحلقة فى السقف)
.
الأول أحب أعرف نفسى مضبوط

أولا الإسم الحركى : ميوشة

العمل :

عمل إيه بس ..مش لما أتخرج الأول
.
الحالة الإجتماعية :

يا مسهل ..ربنا يرزقنى بابن

الحلال ..معندكش واحد ؟؟

عن نفسى :

ناس كتير بيقولوا عليا إنى أسافين (مع إنى ملاك) ..بس اللى أنا

متأكده منه ..إن عندى –بكل فخر- لسان عايز قطعة ، ده غير إنى بحب دايما أحط

بهارات على الكلام (ملح وفلفل والذى منه) ،وممكن أكون دايما ساخرة

شعارى فى الحياة :

عند الإكتئاب ..إنظر حولك ..فبالتأكيد

سوف تجد أشياء (تفطس من الضحك .. نيهاهاهاها)

متهيألى عرفنا بعض كويس ...نبتدى بقى بإسم الله

2. (
البدااااااااااااااااااااااية )

"مبروك يا ميوشة كلية تربية"

دى كانت أول بداياتى مع كليتى المتواضعة كلية التربية .. اللى ماكنتش طبعا كل أملى

فى الحياة ولا حاجة لكن مجبر أخاك لا بطل ، بمعنى إنى كنت بدأت الفشل من

بدرى شوية من الثانوية العامة فمجموعى ودانى تربية..أنا معترضتش والله أنا

بس كنت عايزة كلية أدرس فيها إنجليزى وخلاص، وده إن دل على شئ فيدل على إنى الحمارة الوحيدة

اللى تدخل قسم إنجليزى وهى متعرفشى فى اللغة دى غير كلمتين

(yes &no) ده أنا حتى معرفش

هى مين فيهم أيوة ومين لأ ..بس لما دخلت الكلية إتعلمت

كلمة كمان بقولها لأى حد يسألنى عن اى حاجة وهى

(I don't know) فطبعا بعد ما إكتشفت محصلتى اللغوية الفظيعة دى ..قررت إنى

ما أبخلش على أجيال المستقبل (المظلم على إيدى أكيد) وإنى

أدخل قسم إنجليزى علشان أفيد التلاميذ بعلمى

وخبرتى (3 كلمات مش قليل برضة).

فى الكلية قابلت ناس كتير (طبيعى يعنى) بنات وأولاد ،

والحمد لله ..أنا مش من النوع اللى بتجيله

صدمة حضارية لما يدخل الكلية وألاقى ولاد

بعد ما عشت عمرى كله فى مدارس بناتى ، بس المشكلة إنى معنديش

مشكلة (يا واد يا فيلسوف) ..أنا قصدى يعنى بنات ولا ولاد مبتفرقش معايا ..كلنا رايحين

نتعلم وخلاص.(هههههههه حلوه دى مش كده )

أنا طول عمرى مش إجتماعية بالمرة ..وطول عمرى برضة أصحابى يتعدوا على صوابع الإيد الواحدة ..

لكن معرفش إيه حصلى أول ما دخلت الكلية .. لاقيت نفسى صاحبت أمة

لا إله إلا الله .. وطبعا بما إن كلية تربية تعتبر كلها بنات ، فمواجهتش

موضوع الصدمة الحضارية بتاعة الولاد دى ..حتى فى الدفعة بتاعنا إحنا حوالى

300 فى الدفعة والولاد اللى معانا ميكملوش 15

ولد..والباقى كله بنات(هيه..هيه..أحسن برضة)المهم إن كل حاجة فى الكلية دى حصلت معايا من غير قصد

فلاقتنى صاحبت ناسى كتيييييييييير ..ونمرة تليفونى مع البنات كلها.

[size=21]وأنا كمان فيا ميزة جامده جدا ..أنا من النوع أبو لسان طويل

(النوع ده بيعيش فى أثيوبيا وإنقرض من 3 سنين و أنا أخر

سلالته) بمعنى إنه مبيهمنيش ..يعنى مثلا فى ناس بتتكسف تكلم الدكاترة (متسألونيش

ليه؟؟) أنا بقى مش من الناس دول خالص ..أنا لو

موقفتش قدام الدكتور أسأله وأطلع عينه عمرى ما

افهم (قال يعنى أنا بافهم حتى لما أسأل)

فلما البنات لاقونى نوعا ما جريئة وبكلم الدكاترة

وأتخانق مع الفراشين ..وأجرى ورا المعيدين ..

عملونى حاجة كده زى.. زى.. زى ماما بالضبط

كنت ماما ..يعنى اللى يعوز حاجة يجى يقولى ..وكنت ساعات

بلاقى ناس تيجى وتقولى (إنتى

اللى بتتكلمى بإسمنا) ولا كأنى أحمد عرابى ما

علينا اللى أنا عايزة أقوله بالضبط إنى أول ما دخلت الكلية دى وأنا عرفت إن

حياتى نوعا ما هتتغير بسببها. علشان كده قررت إنى أستمتع بسنين الكلية دى

سنة بسنة أخرج وأتفسح وألعب و...إحم وبعد الشر عنى يعنى أحاول أذاكر
.

و الفكرة دى كانت أساس الفشل

3 . الحلقة التالتة

( عن الإمتحانات وقرفها )

لو إنت فى كلية دلوقتى أو حتى إتخرجت هتعرف إن الترم الأول

فى سنة أولى بيعدى بسرعة جدا وإنت لسه تايه..لسه بتعرف يعنى إيه كلية؟

ويعنى إيه دكاترة؟ ..وهم أصلا ليه إسمهم دكاترة مع إنهم مش بيكشفوا عليا فى

كل محاضرة ولا حاجة؟ ..ليه مش أساتذة زى بتوع الثانوى؟..وليه إسمها محاضرة

مش حصة؟..وليه إسمها دكتورة مش أبلة؟...أسئلة كتير بتقى فى دماغنا وجو

جديد لسه بنحاول نندمج فيه.

أنا طبعا حصلى زى ما بيحصل لأى طالب سنة أولى

(ما أنا زى أى بنت فى الدنيا كلها)

المهم إنى فجأة وبدون سابق إنذار لاقيت جدول

إمتحانات الترم بيتعلق .. لأ والأحلى إنك بتكتشف إن الإمتحانات بعد شهر واحد

("شهر" يادى النيلة ..طب أنا هعمل إيه؟؟)

الجملة دى بيقولها كل الطلبة بعد تعليق الجدول مباشرة

..وغالبا بتبقى العينين باصة لفوق واللسان مدلدل ،وطبعا ده اللى حصل معايا

بالظبط (هو أنا يعنى أحسن منهم؟) .لما بقى روحت ..كنت مكتئبة على الأخر ..كتبت الجدول

بتاع الإمتحانات فى ورقة كبيرة وعلقته على التلاجة..وبعد كده خدت بريك

(إيه .. بتغدى ..أجوع يعنى علشان الإمتحانات ولا إيه؟؟) ..

المهم بعد الغدا خدت نفسى على أوضتى وقفلت الباب بعد

ما كتبت عليه ممنوع الدخول والإزعاج ..

ورحت عاملة جدول مراجعة للمواد كلها..بس إيه ؟؟

جدول محصلش ..أنشتاين نفسه لو شافه هيعترف على طول بعبقريتى ، الجدول كان عبارة

عن إنى هذاكر كل مادةوأراجعها مرتين ..أما أول مادة همتحنها هذاكرها فى

إسبوع لوحدها(والله يا بت يا ميوشة إنتى عشرةعلى عشرة)

مسكت الجدول وبصيت عليه كده بكل فخر ..

وقمت حطاه فى درج المكتب بتاعى وقعدت قدام الكمبيوتر شوية

.. مالكوا بتبصولى كده ليه ؟؟

الجدول لسه هيبتدى من بكرة يعنى النهاردة أدلع نفسى شوية بقى.

بعد إسبوع من وضع الجدول لا قيتنى معملتش أى حاجة منه ..بس

بجد لأسباب خارجة عن إرادتى ..أنا صحيح مش فاكراها كلها بس انا فاكرة إن

فيه يوم كانت ماما عاملة فيه (محشى) ..و إنتوا بقى متعرفوش بقى مين هو محشى

ماما .. دى يا جماعة صواريخ سفرة – سرير ( متعرفش يعنى إيه صواريخ سفرة- سرير).. يعنى

تاكلها وتجرى على السرير لتانى يوم عدل..وفعلا أنا كلت

المحشى من هنا و خخخخخخخ..شفتوا بقى ماما هى السبب.

ويوم تانى بعد الغدا(لأ مكنشى محشى)

كنت بتفرج على المسلسل وبعدين جيت اقوم من قدام التليفزيون معرفتش أبدا ..يا نهار زى

بعضه..أنا شكلى كده.......

أنا :ماما.. إلحقينى يا ماماا..أنا مش عارفة اقوم أنا شكلى إتشليت.

ماما حبيبتى :

تلاقى جسمك نمل من القعدة زى البطةقدام التليفزيون .

أنا ( والدمعة هتفر من عينى ):

يا ماما أنا أعرف إن الإنسان إيده تنمل ..رجله تنمل ..إنما نص جسمه ينمل

؟؟!! وبعدين أنا كنت بتفرج على المسلسل .

ماما حبيبتى :

مسلسل ؟؟!إتقى الله ده المسلسل

المتخلف ده بيخلص الساعة 7 والساعة دلوقتى 1.5 بليل ..حرام عليكى يا شيخة ،

ده أنا اللى هتشل.

وأخيرا .. وبالتعاون مع فرق العلاج الطبيعى ..

تم إفاقة جسمى من الغيبوبة ..

والدكتورأكد إن المده لو كانت زادت شوية ..كنت هلزق فى الكنبة

يا منجي من المهالك يا رب .

_______________

منقول طبعا يعنى

هههههههههههههههههه

دمها خفيف قوى ميوشة

والموضوع ده فكرنى باحلى وامتع ايام وسنين عمرى ( الجامعة )

ميرسى قوى سمسمة

رجعتلى لى ذكريات حلوة وعزيزة على قلبى

ميرسى بجد

ميرسي ليك انتي يا قمر علي مرورك ونورتي

الحلقة الرابعة ( ع الامتحانات وقرفها الجزء التاني
)

بعد كل
اللى حصلى ده ..جتلى فجأة حالة من صحوة الضمير وبصيت للجدول كده لاقيت إنه
فات إسبوعين (ماهو الإسبوع التانى حصلى حاجات
تمنعنى برضة زى الأولانى بالظبط الظبوط)..المهم إنى خدت الجدول
الرائع ورميته فى الزبالة (يا ريت أينشتاين كان خده
..كان حتى إستفاد من عبقريتى)..ومن الأخر عملت جدول جديد خالص
ويتلخص فى إنى يادوب أذاكر كل المواد فى عشر أيام
وأول مادة أمتحنها فى أربع أيام .. بصراحة المادة دى كانت أصعب مادة
..إسمها الحضارة..أو (سيفيليزاشن)..حاجة زى
كده أنا أصلا من النوع اللى بتعقد من أى كلة إنجايزى بتنتهى ب إشن ..فما
بالك كل الكلمة دى .هى مادة كده عاملة زى التاريخ ، تاريخ إنجلترا ..وكلها
بالإنجليزى ..الله يحرق الإنجليز على الإنجليزى ..والكارثة يا اختى إن كل
الملوك فى المادة دى إسمهم يا (ويليام) يا (هنرى )الأول والتانى والتالت والحادى عشر..إيه يا
جماعة مفيش أسامى فى بلدكم ولا إيه؟؟ ولما أوضحت للدكتورة بتاعتى رأيي ده
.. الست يا عينى سخسخت من الضحك وقالتلى

"يا
بنتى الملك بيبقى إسمه أى حاجة عادى ..وأول ما يبقى الملك بيغير إسمه"

حاجة يعنى زى لقب ملكى يعنى ..أه يعنى ممكن مثلا الملك يبقى إسمه تامر بس أول ما يلبس التاج بيبقى ويليام ...هاهاهاها..والله عالم فاضية.

طبعا معنى إن واحدة زيي تذاكر الحضارة ..حد يسألنى ويحرجنى ويقولى يعنى إيه زييك؟ أقوله يعنى عمره فى حياته ما فتح
الكتاب ولا يعرف المادة دى بتتكلم عن إيه ..المهم سيبكو من الفضوليين إللى
بيسألوا دول وركزوا معايا أنا ..كنت بقول إنى أكيد علشان أذاكر المادة دى
مذاكرة نضيفة فأنا أكيد محتاجة إن السنة تبدأ من أول وجديد ..وطبعا أى حد خد حصة واحدة درس خصوصى فى الفيزيا يعرف إن
ده مستحيل إلا فى حالة واحدة إنى أعيد السنة الجاية وعليكو بخير..بس
أنا قررت أنه لا هوان ولا إستسلام ..وقولت لنفسى لسه يا بت يا ميوشة قدامك
4 أيام بحالهم ( يا حوستك يا بهانة) .
أنا طول عمرى بحب التاريخ..ومقتنعة إن فيه طريقتين
لمذاكرتة:

1- إنى أمسك كل فصل وأقعد أحفظ فيه ..يعنى امسك أول فصل وأفضل أحفظه تمام
..وأفرح بنفسى أوى وبعدين ادخل على التانى أحفظة أحسن من الأول..فأطير من
الفرحة وبعدين ارجع للأولانى علشان أراجع الباين على بعض ألاقينى مش فاكرة
منهم ولا كلمة ( طبعا ده لة تغاضينا على كونى عندى
بس 4 أيام ..ومنهم يوم ضاع فى الخطة ).
2- الطريقة التانية بقى (ودى الطريقة اللى بحبها )
هى إنى أقرا الكتاب مرة واحدة على بعضة كأنه قصة مثلا وأفهم الموضوع كله
بيتكلم على ايه بصفة عامة ..وبعدين فى الإمتحان ابدع بقى ..يعنى أخد
الموضوع الأساسى ..وأدخله دماغى وبعد كده أحط عليه التحابيش بقى ( وطبعا التحابيش دى لعبتى)..لسه الفكرة ما وصلتش ( معقولة .. دى خارجة من نص ساعة ) ..طيب أبسطهالك
..وأنا فى تالتة ثانوى كان عندنا قصة فى العربى إسمها يوم القدس(ده أنا سمعت إنهم غيروها)..المهم القصة دى بتاعة عم
صلاح الدين الأيوبى ( هو كان أيوبى ولا قليوبى
) يوم الإمتحان عرفت إن أشهر موقعة للأخ صلاح الدين هى موقعة حطين وفيها
صلاح بيه إنتصر .. فلما جه السؤال عن موقعة حطين أكيد مش هقوله كده بس
..إنما هعيش بقى يعنى مثلا :
كان القائد صلاح الدين يمطى جواده الاصيل (قال يعنى
أنا كنت معاه )..وينظر إلى جنوده فى قوة ويندفع للمعركة فى بسالة ،
وكأنه يبث فيهم روح العزيمة والجهاد التى ستساعدهم على النصر المبين بإذن
الله
وأى همبكة كده والسلام ... بس كده .

برضه ميوشه دى بتفكرنى بنفسى

بس انا ايام الامتحانات تجيلى صحوة الضمير قبل الامتحان باسبوع / عشر ايام كده

وافضل انى اقرأ الموضوع على بعضه وبعدين اشوف انا مش فاهمة ايه

و ( احاول ) افهمه ان كان فيه وقت طبعاً

ولما اكتب بايدى افهم .. ولو ما كتبتش .. يبقى مع السلامة

وطبعاً ما باعرفش ألخص زى بقية الطلبة / الطالبات كانوا بيعرفوا يجيبوا تلخيصات

فى منتهى الروعة .. وماكنتش باحب اتطفل على حد

كنت باعتمد على الله ثم نفسى .. وافضل اكتب لحد ما ايديا تتخدر ..

ومسألة انى ابدع دى .. لكل سؤال ما اعرفشى اجابته

آخذ السؤال وافصصه بسرعه ( جوه الامتحان طبعاً )

واعمله اجزاء واجاوب عن كل جزء لوحده ( حسب الاحساس )

وطبعاً باخلى الاسئلة اللى ما اعرفهاش للآخر علشان الوقت

واكيد لما بابص ورايا على الايام دى بأفضل اقول لنفسى ( هو انا ليه ما كنتش باذاكر )

هى كانت حاجة صعبة قوى كده .. ده انا لو قريت صفحة كل يوم

حاخلص فوق المناهج 4 خمس مناهج تانى ... على مدار السنة الدراسيه

بس الواحد وقتها كان بيبص على الرحلات والحفلات والتلفزيون واللعب

والتسالى والحكايات والمطاعم .. علشان اكل المدينة ما كانش بيكفى

والمسرحيات اللى كانت تيجى تذاكر للجامعه زى مسرحيات محمد صبحى ( live ) طبعاً

يا سلالالالالالالالالالالالالام كانوا اهلينا فاكرينا بنذاكر

بس علشان ما اقسوش على نفسى واظلمها

احنا كانت كليتنا عمليه .. يعنى فيه ابحاث يمكن لكل مادة بحث

فى كل ترم لوحده وممكن البحث يأخد الترم كله وانتى تجمعى فى المادة بتاعته

غير الصور والمقالات وتجمعى امور من الانترنت ومن مناطق البحث نفسه

... و ... و .. و دوخينى يا لمونة

بالذمة نذاكر ازاى .. بس للامانة اللى ما كنش بيخلينا نذاكر اكتر

ان الدكاترة ( اللى مش بيكشفوا طبعاً زى ما قالت ميوشه ) سعادتهم بيحذفوا

يفضلوا يدشوا طول السنة وفى الآخر بيحذفوا 3/4 المنهج

طب ما تدرسوا الضرورى وتخلصوا ..

يبقى الواحد يذاكر ويتعب دماغوا ليه فى حاجة حتتلغى ؟؟

بس تعرفى انا بأحن للايام دى مرة تانيه .. ايام اللامسئولية

احلى ايام العمر ونفسى ارجع بيبى تانى واجيب العمر من اول وجديد

واروح حضانه ومدارس وجامعه من اول وجديد .. على الرغم من الواحدة كانت قرفانه

من المذاكرة ولأهل اللى ما عندهمش غير كلمة ذاكرى ! ذاكرى ! ذاكرى!!!

الا انى عاوزه كل القرف الجميل ده يرجع تانى مذكرات طالبه فاشله 566266

وارجع اذاكر ويمكن اطلع من الاوائل وافرح اهلى

واعمل اللى عليا .. ولا يمكن لو رجعت الايام ارتكب نفس الغلطات تانى

الله اعلم

ميرسى سمسمة على الموضوع الجميل

والجميل فيه اكتر انه حلقات واجزاء

فى انتظار المزيد غاليتى ... لا تبخلى بالمزيد

زائر

هههههههههههههههه

ميوشة دى دمها زى العسل

مذكرات طالبه فاشله 41485